قناع للنوم

قناع العيون المستخدم عند النوم ..
فصورت الطريقة خطوة خطوة أعرضها بشرح موجز 

في البداية الأدوات المطلوبة لصنع القناع :

1/ مقص 
2/ دبابيس 
3/ قطعتي قماش 
الأولى تكون ملونة أو خلونا نقول المراد تحويلها لماسك 
القطعة الثانية راح تكون كبطانة للماسك و طبعاً هي اللي راح تكون ملامسة للعينين فاحرصي كل الحرص على أن يكون قماش ناعم جداً ، أنـا هنـا استخدمت قماش الجوخ لون أبيض .
4/ مطاط 
5/ قلم / طبشور قماش 
6/ ورقة وقلم لرسم الباترون 
7/ قطعة أسفنج لاستخدامها في الحشو 
8/مكينة لخياطة القناع ، ويمكنك الاستغناء عنها بالخياطة اليدوية 

هذي الأقمشة : الأبيض جوخ ، التفاحي هذا للأمانة كان مفرش سفرة أعجبتني ألوانه فأخذته من سيتي ماكس ، الإسفنج يا طويلات العمر يباع عند محلات الخياطة والكلف بالمتر يكون سمكه واحد سنتيمتر تقريباً

هذا المطاط وبرضو من محلات الخياطة والكلف يباع بالمتر 

قلم وورقة وطبشور الخياطة < تحصلونه في المكتبات وأدوات الخياطة 
نرسم الباترون بالحجم اللي نبيه أنـا أخذت المقاس من وحده جاهزة عندي

وهذا بترون جاهز أخذته من النت المقاسات مأخوذة بالإنش

نثبت الباترون على القماش ونرسم بالطبشورة على حدود الباترون وراح يكون هذا الخط مكان الخياطة 
ثم نطلع 1سم ونرسم خط حد ثاني وهذا اللي راح نقص من عنده 
نثبت القماش الأول على قماش الجوخ و نقص بنفس الحجم 

نرجع نثبت ورقة الباترون على الإسفنج و نقص نفس الحجم أو أصغر بمقدار 1/2 سم من أعلى فقط 


الآن وبعد ما جهزنا الأقمشة
نقص المطاط بالطول المناسب .. كيف نأخذ الطول ؟
مرري المطاط على المكان اللي توضع عليه النظارة عادةً وتأكدي أنك ما شديتي المطاط حتى ما يكون ضيق على رأسك بعدين

نبدأ الآن في تجميع القطع ~

الحين ندخل المطاط بين القماشين ويكون وجه القماشين للداخل 
هنا نحدد مكان المطاط المناسب والأفضل أنه يكون بالوسط 

نثبت المطاط بين القماشين بدبوس حتى ما يتحرك ويتغير مكانه عند الخياطة 
نثبت القماشين ببعض بالدبابيس ولاحظوا الدبوسين السود 
المسافة اللي بينهم عند الخياطة ما راح نخيطها ... ليش ؟؟
هذا ما سنعرفه لاحقاً

هنا جاء دور الماكينة .. نخيط القماشين في بعض ولا تنسوا أهم أساسيات الخياطة 
المكان اللي تبدأ الخياطة منه نعمل عليه غرزة عكسية بمعنى نعيد الخياطة عليه حتى ما ينسل الخيط ونفس الشيء عند الانتهاء 
و بعد نعيد الخياطة مرتين على المطاط حتى يثبت بقوة ويتحمل الشد بعدين .

نرجع للمقص مره ثانية 
ونقص القماش الزائد للداخل نفس مثل ماهو واضح في الصورة وهذا الإجراء يكون فقط في الأماكن المنحنية والشبه دائرية وانتبهوا تقصوا الخياطة والهدف منه يسهل علينا فرد القماش في الخطوة التالية 

الحين راح نعرف ليش تركنا تلك المسافة من دون خياطة ؟
لأنه من هذي المسافة راح نعكس القماش 
فدخلي يدك مع الفتحة واسحبي القماش والمطاط على برى حتى ينقلب القناع 
وبعدها دخلي اصبعك وعدلي القماش من جوى حتى تتأكدي أن القماش منفرد بشكل صحيح .. وهنـا بإمكانك تكوي القماش على حدود الخياطة 

مع نفس الفتحة دخلي قطعة الإسفنج و وزعيها مضبوط بحيث ما تكون فيه تكدسات في مكان معين 

بعد ما تدخلي الإسفنج اثني طرفي القماش على الداخل مثل الصورة 

ثم بالإبرة والخيط خيطي خياطة داخلية .. ما تكون واضحة من برى 

هنا بعد ما انتهينا من تسكير الفتحة

الشكل النهائي ~

أتمنى يكون شرحي واضح ..
ومجال الإبداع في هالموضوع كبير جداً ..
وهنـا أكون أنتهت و أرجو من الله القبول والسداد .